Kultura Zuzendaritza Nagusia - Vianako Printzea Erakundea
(Madril, 1942)
Biolin eta konposizio ikasketak egin zituen, batxilergoarekin eta Zuzenbideko lizentziarekin batera. Frantzian eta Alemanian musika ikasketa gehiago egin zituen Maderna, Boulez, Stockhausen, Ligeti edo Adorno maisuekin, besteak beste. Psikologia, Soziologia eta Arte Eszenikoei buruzko zenbait ikasketa ere egin zituen.
1967an Stockhausenen laguntzailea izan zen.
Sariak: Musika Sari Nazionala, 1969 eta 2002an; Gaudeamus Fundazioa (Herbehereak), 1969 eta 1971; Parisko VI. Biurtekoa; Casalsen mendeurrena, Urrezko Harpa, UNESCOren Konpositoreen Tribuna eta Madrilgo Komunitateko Musika Saria. 2013. urtean Madrilgo Goi Mailako Kontserbatorioko Urrezko Domina jaso zuen, eta 2014an Arte Ederretako Merituaren Urrezko Domina.
2016an Tomás Luis de Victoria Sari Iberoamerikarra eman zioten, eta 2018an ADEren Domina.
Madrilgo Goi Mailako Kontserbatorioko Teknika Berrien irakasle izan zen, eta Musikaren Historiako irakasle, Urrutiko Hezkuntzarako Unibertsitate Nazionalean.
Liburu ugari argitaratu ditu eta ikastaroak eman ditu Europako eta Amerikako erakunde eta unibertsitate askotan. Musika-kritikari lanetan jardun du zenbait hedabidetan.
Espainiako Irrati Nazionaleko musika zerbitzuetan lan egin zuen hamaika urtez, eta Irratiko Sari Nazionala eta Ondas Saria irabazi zituen.
1981etik 1985era arte, Espainiako Orkestra eta Koru Nazionala erakunde autonomoko zuzendari kudeatzailea izan zen, eta, 1991tik 1995era, berriz, zuzendari teknikoa. 1985etik 1995era arte, Musika Garaikidea Zabaltzeko Zentroko zuzendari izan zen, eta elektroakustikako laborategia eta Alacanteko Nazioarteko Jaialdia sortu zituen, bai eta lehen 11 edizioak zuzendu ere.
1993tik San Fernandoko Arte Ederren Errege Akademiako kide numerarioa da eta 1977tik 1996ra SGAEko kontseilaria.
1996an Madrilgo Erkidegoko Jaialdietako zuzendaria izan zen. Urte hartako maiatzetik 1999ko uztailera bitartean, INAEMeko zuzendari nagusia izan zen.
1998an Honoris Causa doktore izendatu zuen Madrilgo Unibertsitate Konplutentseak.
Gaur egun, San Fernandoko Arte Ederren Errege Akademiako zuzendaria da.
Konpositore oparoa ere bada: 7 opera, ballet bat, zartzuela bat, 10 sinfonia, musika korala, ganberakoa, antzerkirako eta ikus-entzunezkoetarako musika, etab.
