Ikastaro honen helburua da Nafarroako herritarrei Aro Modernoko kultura ikusaraztea eta kultura horretara hurbiltzea; inprentaren asmakuntzatik Frantziako Iraultzara iraun zuen Aro Modernoak. Premisa da arte eta ondare kultural guztia garaikidea dela, iraganeko adierazpen kulturalek oraingo arazoei buruzko hausnarketak argitzen eta aberasten dituzte eta. Edizio honen gaia gerra da, zoritxarrez gaur egun ere ustekabeko protagonismo izugarria duena.

Gerra esperientzia ikaragarria da, eta gizarte eta garai guztietan gertatu da, intentsitatea beti berdina izan ez bada ere. Kalkuluen arabera, gizakiak azken 3.400 urteetatik 268tan bakarrik bizi izan dira bakean, hau da, erregistratutako historiaren % 8. Aro Modernoan, gerra ohikoa zen; herrialdeen arteko bakealdiak edo su etenak, berriz, bitxiak. Oso garai gerrazalea izan zen Europan, eta Estatu guztiak batera inplikatu ziren gerra batzuetan: Hogeita Hamar Urtekoa (1618-1648) edo Zazpi Urtekoa (1756-1763), besteak beste. Espainiak gerra askotan parte hartu zuen, habsburgotarrek etsai ugari zituztelako: Frantzia, Otomandar Inperioa, Ingalaterra. Beste batzuen aurkako gerretan ere sartu ziren: Amerikako konkista gerrak, Flandriako matxinada eta Ondorengotza Gerra, Espainiako dinastia aldatu zuena.

Bakea desira bat zen herritarrentzat eta agintarientzat, bake mina zuten, baina behin eta berriz, Cervantesek Aljerko Tratua obran esan zuen bezala, “gerra asegaitz eta bihozgabeak bake ederra akabatzen du”. Gerraren etengabeko presentzia ugaria zen, halaber, garaiko kultura adierazpenetan, hala nola pinturan, eskulturan, arkitekturan, literaturan, musikan, ingeniaritzan edo filosofian.