Kultura Zuzendaritza Nagusia - Vianako Printzea Erakundea
Nafarroako Gobernua

Vianako Printzea Kulturaren Saria

Nafarroako Gobernuak, Kultura Zuzendaritza Nagusiaren bidez, foru agindu bat onetsi du, Apirilaren 15eko 85. NAOn argitaratua, Vianako Printzea Kulturaren Sariaren 2021eko oinarriak ezartzen dituena. Sariaren helburua da aintzat hartzea kulturaren edozein arlotan pertsona edo erakunde nabarmenek egindako lana, dela sorkuntzan, ikaskuntzan edo ikerkuntzan, dela kultura hedatu eta sustatzeko lanetan.

Proposamenak NAOn argitaratu eta hurrengo egunetik aurrera aurkezten ahalko dira 2021eko maiatzaren 3ra arte. Kultura eta Kirol Departamentuko Idazkaritza Tekniko Nagusira igorriko dira (Navarrería kalea 39, 1.; 31001 Iruña, Espainia), posta ziurtatuaren bidez, gutun-azalean 2021eko Vianako Printzea Kulturaren Sarirako dela adierazita. Mezularitza zerbitzuaren bidez igorriz gero, mezu elektroniko bat bidali beharko da premioprincipedeviana@navarra.es helbidera, eta igorpenaren berri eman beharko da, proposamenak aurkezteko epearen barnean. Halaber, aurretik aipatutako helbide elektronikoaren bidez aurkez daitezke hautagaitzak. 

Saria 20.000 eurokoa da, eskudirutan.

Proposamena egiten duten erakundeak, eskatutako dokumentazioa eta epaimahaia

Nafarroako Kultura eta Arteen Kontseiluko kideek eta edozein herrialdetako erakunde publikoek (gobernuak, ministerioak, udalak, unibertsitateak, akademiak, ikerketa zentroak, enbaxadak, kontsulatuak eta abar) aurkezten ahalko dituzte hautagaiak, baita edozein herrialdetako legez eratutako hezkuntza, kultur, gizarte entitateek zein GKEek ere; orobat, erakundeak gonbidatutako pertsonalitateek.

Saria norberarentzat edo norberak ordezkatzen dituen erakundeentzat eskatzeko aurkezten diren hautagaiak baztertu eginen dira.

Hautagaitzekin batera, honako dokumentazio hau aurkeztu beharko da: proposamena egiten duen erakundea edo pertsona egiaztatzeko datuak, merezimenduen laburpena eta ibilbide pertsonal edo profesionala, eta alegatutako merezimenduak abalatu eta egiaztatzeko aukera ematen duen edozein dokumentazio osagarri.

Sariaren epaimahaiak, Nafarroako Kulturaren eta Arteen Kontseiluko kideek osatuak, hautagaitzak aztertuko ditu eta, merezimenduez gain, Nafarroarekin duten lotura berezia baloratuko du.

Nafarroako Gobernuak ekitaldi publiko batean emanen du saria, eta data behar bezala iragarriko da.