Kultura Zuzendaritza Nagusia - Vianako Printzea Erakundea
Nafarroako Gobernua

Oinarriak

Nafarroako Gobernuak, Kultura Zuzendaritza Nagusiaren bidez, foru agindu bat onetsi du, Apirilaren 15eko 85. NAOn argitaratua, Talentu Artistikoa Sustatzeko Sariaren hurrengo edizioaren oinarriak ezartzen dituena.  Sariak helburu du Nafarroako gazte ekintzaileek artearen eta kulturaren arloetan duten ekimena babestu eta bultzatzea, bai eta gazteentzat erreferente bihurtzea ere, eta Nafarroan sortzen ari den talentua ikusarazteko eta profesionalizatzeko bidean laguntzea. 

Proposamenak NAOn argitaratu eta hurrengo egunetik aurrera aurkezten ahalko dira 2021eko maiatzaren 3ra arte. Kultura eta Kirol Departamentuko Vianako Printzea Erakundea-Kultura Zuzendaritza Nagusira igorriko dira (Navarrería kalea 39, 1.; 31001 Iruña, Espainia), posta ziurtatuaren bidez, gutun-azalean Talentu Artistikoa Sustatzeko 2021eko Sarirako dela adierazita. Mezularitza zerbitzuaren bidez igorriz gero, mezu elektroniko bat bidali beharko da  dg.cultura.ipv@navarra.es helbidera, eta igorpenaren berri eman beharko da, proposamenak aurkezteko epearen barnean. Halaber, aurretik aipatutako helbide elektronikoaren bidez aurkez daitezke hautagaitzak. 

Kultura eta Kirol Departamentuak, irabazlearekin adostuta, proiektu artistiko edo kultural bat (gehienez ere 10.000 eurokoa) programatu eta/edo erakutsiko du, bere proiektuen edo programa propioen barnean edo agente kulturalekin elkarlanean garatzen dituen batzuen barnean, 2022an.

Proposamena egiten duten erakundeak, eskatutako dokumentazioa eta epaimahaia

Saria norberarentzat edo norberak legez ordezkatzen dituen entitateentzat eskatzen dutenek aurkezten ahalko dituzte hautagaitzak.

Hautagaiek 18 eta 30 urte artean izan beharko dute, eta legezko bizilekua Nafarroan eduki, hautagaitzak aurkezteko epea bukatu baino lehen. Hautagaiak legezko bizitokia Nafarroan ez badu, egiaztatu beharko du Nafarroarekin erlazionatutako edo lotutako proiektu edo jardueretan parte hartu duela.

Hautagaitzekin batera, honako dokumentazio hau aurkeztu beharko da: proposamena egiten duen erakundea edo pertsona egiaztatzeko datuak, proposamena bultzatzen duten merezimenduak aipatzen dituen azalpen-memoria eta hautagaitza bultzatzen duen gutun bat, gutxienez.

Honako hauek osatuko dute epaimahaia: Vianako Printzea Erakundea-Kulturako zuzendari nagusia, zuzendaritza nagusi horri atxikitako zerbitzuetako zuzendariak eta Nafarroako Kulturaren eta Arteen Kontseiluko kide bat. Epaimahaiak hautagaitzak aztertuko ditu, eta, bakoitzaren merezimenduez gainera, honako hau ere baloratuko du: hautagaiak zer proiektu edo jardueratan parte hartu duen, horiek Nafarroan izan duten eragin sozial eta kulturala.

Nafarroako Gobernuak ekitaldi publiko batean emanen du saria, eta data behar bezala iragarriko da.

 

Bilatzailea